Birinci verilişdə neftin ilkin mərhələlərdə necə istifadə olunduğundan söhbət açılır, Qərbi Pensilvanıiyada ilk neft quyusunun fəvvarə vurmasından, qədim dövrlərdə Azərbaycanda neftin çıxarılmasını təsdiqləyən faktlardan, neft quyularının car Rusiyasının ixtiyarına keçməsindən, sənayenin inkişafı ilə əlaqədar neftə tələbatın artmasından, eləcə də Con Rokfellerin neft səltənətindən bəhs edilir. Yazıçı Manaf Süleymanovun, tarixçi Mira Əliyarovanın, tarix elmləri doktoru Mahmud İsmayılovun müsahibələri səslənir.

  İkinci verilişdə Rokfellerin “Standart Oyl” şirkətinə  qarşı yaranan ciddi rəqabətdən, eləcə də Bakı neft sənayesi inkişafının başlanğıcından bəhs edilir, XX əsrə qədərki hadisələr yada salınır. Dinləyicilər görkəmli tarixçi Mahmud İsmayılovun, yazıçı Manaf Süleymanovun, tarix elmləri doktoru Süleyman Əliyarlınn səsini eşidə biləcəklər.

   “Neft uğrunda mübarizə” silsiləsinin üçüncü verilişində Birinci Dünya müharibəsi və böyük inqilab astanasında neft sahəsində baş verən mühüm hadisələr əksini tapır. Tarix elmləri doktoru Mahmud İsmayılov, Bakı Dövlət Universitetinin professoru Süleyman Əliyarlı, eləcə də qocaman neftçi, Sosialist Əməyi Qəhrəmanı Musa Bayramovun müsahibələrindən parçalar səslənir.          

  Dördüncü veriliş dünyada siyasi dəyişikliklərin, əsasən də Rusiyada proletar inqilabının baş verməsi, bunun neft sənayesinə təsiri və həmin dövrdə dünya neft sənayesindəki yeniliklər, o cümlədən “BP” şirkətinin yaranması barədədir. Moskvalı professor Saleh Əliyev öz mülahizələri ilə, habelə yazıçı Manaf Süleymanov və H.Z.Tağıyevin nəvəsi Səfiyə xanım öz xətirələri ilə bölüşürlər.  

Beşinci verilişdə dünyanın iki sistemə bölünməsi və bunun neft sənayesinə təsiri açıqlanır. Azərbaycanda Şura hökumətinin qurulması, A.P.Serebrovski və S.M.Kirovun fəaliyyəti ilə bağlı faktlar təqdim olunur. Tarix elmlər doktoru Adil Məmmədov, Sosialist Əməyi Qəhrəmanı, fəxri neftçi Musa Bayramov, yazışı Manaf Süleymanovun müsahibələri səslənir.

Altıncı verilişdə II Dünya müharibəsi və Azərbaycan neftçilərinin misilsiz əmək qəhrəmanlığından danışılır. Görkəmli dövlət xadimi N. K. Baybakov, tanınmış neftçilər Bəhman Hacıyev və Musa Bayramovun xatirələri səslənir.  

Yeddinci verilişdə Fars körfəzi və Ural-Volqa bölgəsinin neft mərkəzinə çevrilməsi, “Neft Daşları”nın salınması, Xəzərdə 1957-cu il 20 noyabr faciəsi, OPEK-in yaradılması diqqət mərkəzindədir.  

Səkkizinci verilişdə müstəqil Azərbaycanın neft siyasətindən, eləcə də “Əsrin kontraktı”nın imzalanmasından bəhs olunur. Azərbaycan prezidenti Heydər Əliyev, Dövlət Neft şirkətinin prezidenti Natiq Əliyev, şirkətin rəsmisi  Valeh Ələsgərov, xarici işlər naziri Həsən Həsənovun müsahibələrindən parçalar səslənir.

Proqramın sonuncu - doqquzuncu verilişində “Əsrin kontraktı” ilə bağlı mübahisələr, rəylər, sıravi vətəndaşların ümidləri öz əksini tapır.  Verilişdə Dövlət Neft şirkətinin prezidenti Natiq Əliyev, şirkətin vitse-prezidenti, tanınmış geoloq Xoşbəxt Yusifzadə, xarici işlər naziri Həsən Həsənov və rusiyalı professor Saleh Əliyevin mövqeləri açıqlanır.